政Whats噏:促引外勞司機被指搵錯局 易志明轟官推莊

20190425
東網電視
更多新聞短片
易志明窮追羅致光要求引入外勞司機,對方反叫佢搵陳帆處理司機車牌問題先。(設計圖片)
職業司機高齡化問題愈來愈嚴重,唔少公共運輸服務嘅司機平均年齡都超過60歲,長此下去服務會受影響。立法會航運交通界議員易志明為此就建議引入外勞,據了解,佢為咗呢件事不斷窮追勞工及福利局局長羅致光,要求盡快將司機納入補充勞工計劃內,但勞福局就覺得佢搵錯政策局,反叫佢搵運輸及房屋局局長陳帆處理司機車牌問題先喎。
政府今年1月回覆易志明有關公共小巴司機高齡化嘅書面質詢指出,截至舊年底,60至69歲持有有效公共小巴正式駕駛執照嘅人數達5.7萬人,70歲或以上就有1.47萬人,80歲或以上者有1300多人。雖則政府規定70歲以上司機有醫生證明就可以繼續揸車,但70、80歲日日揸8小時,都咪話唔令人擔心。
為咗引入外勞做司機,易志明已多次喺立法會大會、事務委員會同書面質詢上「狙擊」政府。有政府消息透露,私下易志明亦不斷窮追羅致光,皆因勞福局就係負責外勞政策,但勞福局研判認為,就算真係開路畀運輸業引入外勞,但唔可能以國際車牌喺香港開工,本地與外地車牌亦唔係完全互通,覺得要運房局有政策配套支持,有勞福局中人直言易志明搵錯局,感到冤枉。
問到係咪有不斷追勞福局做嘢,易志明直認不諱,兼且炮轟勞福局「亂噏」,話業界向佢反映幾十年前已經試過引入外勞司機,當時都無駕駛執照問題,嘲諷話飲食界唔夠人,唔知局長會叫飲食界議員張宇人去搵邊個政策局呢?認為車牌問題只係「攞嚟講」。
佢又話一個社會不斷發展,自然有工種會冇人想做,要維持正常服務就始終都要諗引入外勞,唔好話要保障本地人,依家係本地人唔願做,兼且香港已經係全民就業咗好耐。佢坦言政府只有一個,負責搞勞工嘅政策局見到一個行業唔夠人就要諗計,無理由要議員逐個局去拍門處理,直斥兩位局長根本喺到耍佢。
其實香港已面臨高齡海嘯,唔止司機,好多較基層、甚至厭惡性行業都有同樣問題,總有日會因人手短缺而無服務。兩個政策局互相「推莊」、各自為政,但民生事又豈能分得清清楚楚,唔通又要等到出事先肯認真處理?