政Whats噏:議員呻會議撞時間 盧偉國神回應

20190426
東網電視
更多新聞短片
盧偉國搬出資深論,回應議員的微言。
立法會不時出現同時間召開幾個會嘅情況,唔少議員都要不停轉房發言或投票。而今早(26日)就同時開3個會,其中工務小組更係加開會議,有議員似乎有啲微言,到底主席盧偉國點拆招呢?
今早立法會有工務小組委員會、交通事務委員會同埋支援癌症病患者事宜小組委員會同步進行,其中工務小組嘅會議多次要進行表決。會上第一次響起表決鐘聲係為處理臨時動議,多名議員都由隔離房返嚟參加表決,其中張宇人就問有幾多條臨時動議要處理,仲話同時間有幾個會議進行緊。
主席盧偉國就話有兩條要處理,仲話立法會除咗有會議廳外,仲有會議室一、二同三,其中會議室二更可以一分為二,所以同時舉行幾個會議唔出奇,議員都習慣走嚟走去咁話。不過,身型有一定份量嘅張宇人就嘆唔習慣,盧偉國即反擊話張夠資深點會唔慣,唔使太謙虛喎,而且最近立法會事務多,多會議開。
會議最後都順暢完成,兩小時會議仲處理到3個議程,搞到盧偉國都忍唔住口話「今日豐收」,睇嚟佢好滿意。