政Whats噏：立會將表決預算案　陳茂波傳訊息畀議員拉票

新一份財政預算案劣評如潮，政府跪低派4000港元亦派到天怒人怨。立法會今日(15日)繼續審議預算案，可能驚過唔到關，財政司司長陳茂波(波叔)喺會上用手機發訊息畀議員，促請給予支持，擺明係拉票。不過，拉票通常都係政助去做，唔通波叔信唔過啲政助，所以要親自上陣？

波叔今日喺立法會坐鎮，東網記者發現佢攞手機出嚟，對住個電話口噏噏，原來佢係語音輸入變成文字，然後向議員發訊息。內文係話「最近議會的工作辛苦您了，我原不好意思再打擾你，但今明兩日是立法會大會，繼續審議財政預算案，估計明天黃昏前後議員應可投票，希望屆時能得到您支持！您的肯定，會鼓勵我們整個團隊繼續全心全意為香港打拼(拚)。」

呢段訊息係傳畀建制派議劉國勳，而下款就寫住「Paul」(佢嘅洋名)，相信所有建制派議員都收到，亦見到佢發畀部分民主派議員。老實講，份預算案做得咁差激起民憤，當然要搵人撐，但到咗依家就嚟表決先拉票，臨急抱佛腳又有冇用呢？