政Whats噏：議會衝突受傷　陳恒鑌葛珮帆獲贈鎮痛貼

立法會近期立立亂，就好似上周六(11日)負責審議《逃犯條例》修訂嘅法案委員會，泛民就同建制派爆發正面衝突，搞到議員又要報警同送院，氣氛相當緊張。議員葛珮帆同陳恒鑌當日都有去醫院驗傷，今日(15日)佢哋獲贈鎮痛貼。

當日陳恒鑌肩膊受傷紮住左手見人，葛珮帆驗傷後證實頸後軟組織受傷。不過，佢哋今日就話收到由中藥業界朋友送贈鎮痛貼，對方話見到立法會有衝突好擔心，加上知道今次有保安同埋議員齊齊受傷，所以就送畀佢哋當慰問囉。

葛珮帆話，呢啲鎮痛貼係由行內人所贈，唔知藥效會唔會特別顯著，用後快啲好番呢？不過，佢同陳恒鑌都話要即刻用，又嘆估唔到做議員都要捱打，同埋識打木人巷先開到會，希望立法會唔會再有呢啲場面喎。其實呢個都係香港市民卑微嘅心願嚟，唔知幾時先實現到嘞。