政Whats噏:怕撞法案會議 立會足球賽讓路

2019年05月15日 18:52
東網電視
更多新聞短片
立法會足球隊嚟緊賽事改喺星期日踢。

立法會足球隊間唔中都踢下友誼波,而原定喺嚟緊嘅星期六(18日)會同九龍地域校長聯會校長足球邀請隊比賽,但最近就改咗期,去到下個月9號先踢嘞!依排立法會立立亂,建制派同泛民主派嘅氣氛仲愈嚟愈僵添,唔通係因為氣氛問題而改期?

原定喺星期六嘅球賽喺深水埗運動場舉行,足球隊召集人何俊賢(高佬賢)就話本來仲邀請埋黨友、身兼深水埗區區議員嘅立法會議員鄭泳舜一齊落場添,話因為係佢地頭喎。之不過嚟緊唔止改日子,連場地都轉埋,由深水埗運動場轉去元朗大球場踢,唔知鄭泳舜到時會唔會都照樣去踢呢?

點解會改期?高佬賢話因為最近有唔少法案委員會要開會,包括國歌條例草案同埋修訂逃犯條例草案,有時都要加開會議,所以喺評估過風險後,都係決定改期喎。佢仲話好多時球賽都喺星期六舉行,但眼見依家好多星期六都要加會,所以就索性改喺星期日進行。話到明係友誼賽,唔知兩派議員踢完之後,會唔會乘機踢走埋啲怨氣呢?