政Whats噏：開會口擘擘　張宇人睡魔急call？

立法會會議經常冗長又沉悶，過去唔少議員被發現喺開會期間被睡魔急call，瞌眼瞓「釣魚」，甚至瞓着咗。今日(16日)喺立法會審議財政預算案期間，似乎又再出現此現象。飲食界議員張宇人(Tommy)就預算案嘅修正案表決期間，就瞌埋雙眼，成個身幾乎打平攤喺張櫈度，仲一度擘開口。唔知佢只係閉目養神，定真係瞓着咗呢？

話說議員就預算案提出咗50幾項修正案，立法會今朝10點半就開始表決，一路表到12點，足足個半鐘，呢段期間就發現Tommy攤喺座位，仲緊閉雙眼，好似喺沙灘椅享受緊日光浴。

雖則審議預算案無論議員同啲官嘅發言都係三幅被，真係悶極，之但係要表決50幾項修正案，班議員都唔敢走開，個個都坐定定，而啲修正議案係要逐一表決嘅，剩係投票都投到手軟。喺咁嘅情況下，Tommy如果都可以瞓着覺，咁就確係離奇喇。