政Whats噏:馮英倫囝囝出世 親戚傳授湊仔經

2019年05月18日 12:19
東網電視
更多新聞短片
馮英倫(上)嘅囝囝馮以仁出世。(受訪者提供)

對於想生兒育女嘅父母嚟講,能夠迎接自己嘅仔女來臨,絕對係萬分期待嘅開心事,好似發展局局長政治助理馮英倫(Allen)嘅囝囝馮以仁尋日(17日)出世,Allen直言好開心,話太太係預約開刀,過程都相當快,只係計生仔都係半個鐘左右,前前後後一個鐘就已經搞掂晒,相當順利,母子平安。Allen都有全程陪住太太,仲話依家香港已經有侍產假,所以唔單止可以陪太太入產房,未來幾日都有多啲時間陪佢喇!

對於第一次做爸爸嘅Allen嚟講,唔多唔少都有啲緊張,不過佢都有信心搞掂,畢竟佢同太太一早已經做足功課,睇咗好多教新手父母點做嘅資料,亦都請咗陪月員,了解晒陪月應該要食乜等。Allen仲話雖然佢哋冇湊仔經驗,但佢有好多長輩同親戚朋友都有,特別係有啲親戚最近先抱孫,都畀咗唔少意見佢哋,睇見Allen準備咁充足,相信湊仔都應該難唔到佢喇。