4惡漢旺角追債不果掟木板滅火筒 2露宿女受傷

2019年05月24日 12:00
東網電視
更多新聞短片
天橋底擺放不少雜物,欄杆掛滿露宿者衣物。(曾紹良攝)

旺角甘芳街近德昌街一條行人天橋底,今早(24日)10時許,4名年約30餘歲的本地惡漢到上址追數,惟「債仔」不在,惡漢遷怒在場2名分別姓陳(58歲)及姓朱(65歲)本地女露宿者,向她們飛擲木板及滅火筒,又揮拳襲擊,惡漢逞兇後逃去,2女驚魂甫定後,報警求助。警方經初步調查,將案件列襲擊、刑事毀壞及收債,兩女則由救護車送院治理。

據捱打的女事主朱姐憶述:「當時佢哋幾個人衝過來,一入嚟就話要搵『四眼仔』,我咪話無呢個人」,詎料即遭對方打傷。她指自己領綜援,原本在甘芳街單位居住,惟因無錢交租而被趕走,數月前與女友人搬到橋底。被問到會否怕惡漢再來搗亂,她無奈稱:「唔驚得咁多,無辦法」。

據了解,深水埗通州街橋底「南亞村」今年初「拆村」後,南亞假難民大遷徙,佔據旺角渡船街及油麻地西九龍走廊一段行車天橋底,趕走原本的本地露宿者,重建「南亞新村」,部分本地露宿者被趕離後,遷至附近的橋底居住,包括上址甘芳街橋底。

油尖旺區議員許德亮指,涉事橋底數年前已有人居住,形容:「佢哋成日喺度便溺,呢面啲燈光又暗,又會有女士經過」,嚴重影響環境衞生及治安,數年前更試過有人在橋底煮食釀火警,令毗鄰的甘芳閣大廈外牆嚴重熏黑。該批露宿者及後獲安排上樓,相關部門亦用圍欄將花槽全封,惟約半年前開始,有人將部分圍欄拆走,遷入花槽居住,他嘅嘆:「根本解決唔到問題,一批走左一批又嚟」。

至於毗鄰的渡船街橋底「南亞新村」,許批評該處治安問題嚴重,指:「晚晚都有人喺度收數、叫囂、打架,有人會喺嗰度販毒吸毒,甚至竄上鄰近唐樓梯間同天台吸毒,所以街坊出入都好驚,成日投訴」。他就此多次在區議會反映,亦去信多個部門要求改善問題,惟他批評:「無一個部門願意牽頭解決個問題」,致令問題一直未能解決,他希望相關部門能正視問題,安置有真正需要的露宿者,再拆走所有木板屋及「竇口」。

甘芳閣業主立案法團前主席何生指,火警令大廈外牆大面積嚴重熏黑,修理工程花費逾8萬元,但保險僅賠2000多元,其餘的要各業主夾錢支付,無辜蒙受損失。街坊曾女士批評露宿者影響衞生,稱:「佢哋成日周圍屙屎痾尿,又掉啲床褥出嚟,佢哋好惡㗎,好麻煩」。街坊付小姐亦指,露宿者影響衞生及治安,希望相關部門能盡快安置好他們,還居民寧靜社區。