政Whats噏︰臨時取消會議 工務小組塞到爆

2019年06月12日 21:51
東網電視
更多新聞短片
工務小組委員會審議進度強差人意,議程一直積壓,盧偉國唔知點好。(設計圖片)

立法會工務小組委員會審議進度一直強差人意,對於議程一直積壓,工務小組委員會主席盧偉國早已經嗌晒救命。工務小組連同今日(12日),喺今個立法年度原本仲有兩次會議,以處理餘下多項議程,不幸嘅係今日嘅會議要取消,變相喺本法年度只餘下一次會議,真係可以話係雪上加霜喇!

其實,工務小組過往審議撥款申請嘅進展一直唔理想,主要係民主派拉布,拖住部分工程項目,而工程業界亦不時走出嚟批評民主派拉布,搞到好多工程都開展唔到,令到業界嘅生計都受到影響。再加上最近無論建制同民主派都批評盧偉國主持會議嘅手法,不時發生爭拗,審議嘅進度就進一步拖慢。

立法會仲有約一個月就暑假休會,結束今個立法年度。而工務小組喺呢個立法年度,原本仲有兩次會期,即今日以及下周三(19日),以處理餘下四項議程所涉及嘅多項工務工程。點知今日工務小組原訂喺早上8時半舉行嘅會議,就因立法會外有騷亂而臨時取消。作為主席嘅盧偉國今早就喺原訂開會時間前,透過立法會秘書處宣布,由於立法會大樓外有大量群眾聚集,大樓部分入口被阻塞,故取消會議,令到工務小組只餘下下周三一次會議。

盧偉國早喺上星期已經喺電台節目「告急」,指出喺呢個立法年度,工務小組已審議咗涉及1300多億元嘅工程項目,召開咗66小時會議,已經係過往會議嘅雙倍,但仍未完成涉及1700多億元嘅全部政府工程,認為有需要加會。相信盧諗唔到嘅係,依家都未加會,就先要取消會議喇!

根據工務小組嘅議程,餘下嘅四項議程涉及多項政府工程,包括活化翠屏河、臨華街遊樂場及其鄰近範圍嘅改善工程、涉及本港多區嘅污水收集系統同水渠復修工程、興建鯉景道綜合大樓分區圖書館及安老院舍、於長洲建社區會堂暨民政諮詢中心、擴建九龍城區海心公園、喺沙嶺墳場興建骨灰安置所同紀念花園設施、以及興建行人隧道以配合沙田石門安興里骨灰安置所計劃等,真係多籮籮。

不過,盧偉國依家攝高個枕頭諗幾時加會都可能冇用,事關以立法會依家呢個形勢,幾時可以恢復會議,令議會正常運作都未知,所以千算萬算都分分鐘係嘥氣喇!