政Whats噏:門罅洩私隱 搵財神救命

2019年06月13日 16:18
東網電視
更多新聞短片
貼財神喺門上遮住,睇唔到裏面嘅情況。

唔少人喺農曆新年前,都會喺門口當眼處貼上各種形形色色嘅揮春同對聯。立法會議員同區議員好多時都會寫下揮春應下節咁,有時仲會貼埋喺辦公室門口添!不過近日其中一層嘅立法會議員辦事處度門,就無啦啦有張財神爺貼咗喺度。其實農曆新年都過咗大半年,點解依家先嚟貼張財神爺呢?

話說喺立法會,每一層議員辦事處樓層都會有一度門,要先經過度門先可以進入辦事處範圍。嗰度門同議員辦事處嘅門,分別之處就係嗰度門有四個窗,可以望到走廊,但最近喺六樓嘅議員辦事處範圍外嘅門,嗰四個窗就被封住咗,所以喺外面就睇唔到走廊喇!

據了解,由於近日立法會太混亂,喺依個兵荒馬亂嘅情況下,議員會周圍走都好正常。為咗唔想自己嘅行蹤外洩,所以日前有人就用啲唔同嘅物資,貼喺四個窗上,而其中一張仲要係財神爺嚟添!仲唔係好似平時啲揮春咁貼喺上面,而係貼咗喺下面嘅窗喇!

其實,依家科技咁發達,唔少人都開始擔心私隱問題。家陣有人咁做,唔知啲議員,尤其係好關注私隱嘅泛民議員又會唔會效法呢?