政Whats噏:擬燒戰火落區議會 林卓廷被仆低

20190613
東網電視
更多新聞短片
林卓廷擬燒戰火落區議會。(設計圖片)
立法會原擬於昨日(12日)恢復修訂逃犯例草案二讀,但因大批示威者包圍立法會,議員無法入內而遭到拖延,立法會一連三日取消會議。隨着示威者被驅散,立法會今日(13日)外圍嘅情況稍後平靜,但民主黨嘅立法會議員兼北區區議員林卓廷聯同黨友就想將「戰火」燒落區議會,喺區議會會議上提出臨時動議,要求將討論反修例納入議程,隨即掀起罵戰,動議最終喺一片反對聲下被否決。
話說北區區議會今開會,喺會議臨近尾聲時,林卓廷同黨友陳旭明突然攞出寫有反修例字樣嘅紅色紙牌,要求主席蘇西智接納其臨時動議,將討論修逃犯例列入議程。作為議程提案人嘅陳旭明堅持即場讀出其動議內容,「可以唔討論,但我都要讀內容出嚟!」此舉惹嚟另一區議員溫和輝不滿,直斥對方點解要故意喺會上讀出內容,故弄玄虛。
溫和輝即時問主席佢可唔可以就呢件事發表意見,陳旭明同溫和輝即展開罵戰,二人一齊開咪發言鬥大聲「爭嘢講」,現場嘈吵不堪。期間林卓廷想「加把嘴」為陳旭明幫腔,溫和輝扯火質問對方「林議員,你講嘢得,我講嘢就唔得呀?」雙方又罵起上來,其他區議員即時高呼,要求等主席決定邊個可以發言。
蘇西智先讀出區議會常規,試圖煞停亂象,佢話區議員唔能夠在區議會會議上討論未列入議程嘅事項,繼而主持投票,要求在場嘅議員決定係咪將相關議題納入議程。但陳旭明繼續「把口唔收」,辯稱基於會議有錄音,讀出動議內容可方便有視力問題嘅民眾得知會上曾有呢項臨時動議,最終獲主席批准讀出動議內容,包括譴責修例。
喺陳旭明讀完動議後,溫和輝即開咪要求發言,蘇西智眼見他們又有機會爆罵戰,即行使主席權力禁止二人發言同爭論,直接進行投票表決。但陳旭明出言挑釁主席,質問對方點解唔准自己發言,「你驚呀?」行為相當「小學雞」。蘇西智反駁:「驚唔驚係另一回事,(驚)都係你話啫!」跟住就表決。最後動議喺十六票反對、四票贊成同一票棄權下,不獲通過。
臨時動議被仆低後,陳旭明同林卓廷隨即發難大聲譴責政府漠視民意,之後起身離場,一場大鬧區會嘅鬧劇終於結束。