政Whats噏:泛民為抽水 企圖喺區議會傾政治嘢

2019年06月14日 20:48
東網電視
更多新聞短片
泛民區議員為抽水,企圖在區議會內討論非地區事務。(設計圖片)

近日《逃犯條例》修訂鬧到滿城風雨,戰線更加由立法會擴散至區議會,繼昨日北區區議會有議員提出臨時動議,要求將修例納入議程討論但遭否決後,再有中西區區議會同灣仔區議會,分別有民主黨中西區區議員吳兆康及灣仔區議員楊雪盈,都企圖想傾有關議題,不過分別因為唔符合相關規則,或冇人和議議案而傾唔成。睇嚟大家都覺得區議會應當集中傾番當區嘅民生項目,唔想再將政治議題帶入區議會,加上建制派喺呢兩個區議會都佔多數,搞到民主派議員「抽唔成水」喇!

話說中西區區議會嘅文化康樂及社會事務委員會昨日(13日)開會,原本會議議程只係討論長者牙科服務、麻疹疫苗、救生員不足等民生問題,不過去到會議結束前,突然有兩個嚟自民間團體嘅旁聽人士要求發言,提出要討論《逃犯條例》修訂。喺文康會提出傾呢啲,聽落認真古怪,委員會主席陳捷貴當時拒絕咗,但吳兆康就力撐旁聽人士,覺得修例屬社會事務,應該可以討論,同陳捷貴爭論咗一輪添。

陳捷貴解釋,按照程序,如果想討論某啲議題,必須要事先通知,若獲批就會加入議程,嗰兩名旁聽人士突然提出,本身並無相關議程,自然唔會批准。陳仲話,喺會議當日朝早曾同其中一個旁聽人士通過電話,對方當時都冇提到要喺會議上討論,點睇都唔合理。

陳又話即使批准都冇用,事關當時會議已經結束,佢都已經宣布埋下次開會日期,絕大部分議員都已經離開咗,加上旁聽人士冇權發言,只有議員先可以參與討論,所以冇議員在場基本上都係冇得傾,如果旁聽人士事先要求,就會了解下其他議員意願,例如覺得呢個議題適唔適合喺文康會入面傾先再作決定。聽落吳兆康真係撐錯人嘞!吳兆康喺截稿前未有回覆。

灣仔區議會方面,議員楊雪盈就諗住遞交譴責香港警察濫用權力、武力嘅動議,不過傾唔傾得成就好難講,事關雖然佢好積極動議,但暫時就冇人和議,佢喺社交網站透露只係收到3個議員回覆,其中屬民主派嘅鄭其建都拒絕和議,直言「如果會議沉悶我隨時會離席,所以唔好搵我和議啦。」不過就算搵到人和議,都仲要得到區議會主席批准,咁睇嚟楊雪盈嘅議案都好大機會凍過水喇!楊雪盈喺截稿前亦未有回覆。

查實區議會好多時都只係針對番當區嘅項目去傾,要觸及政治議題,真係要有足夠支持至得,喺建制派佔多數嘅區議會入面,自然好難傾得到,各區民主派如果諗住趁住社會關注呢個議題,就借機抽水,結果咪就係接二連三咁觸礁囉!