政Whats噏︰律政司連番甩轆 月花近8萬請傳訊主任

2019年06月17日 20:01
東網電視
更多新聞短片
政府修訂《逃犯條例》搞到一鑊粥,葉劉淑儀都鬧爆。(設計圖片)

自律政司司長鄭若驊去年1月上任之後,唔止佢自己因為甫上任就捲入寓所涉僭建等風波,醜聞多多,就連由佢率領嘅律政司亦都連番甩轆,律政司同本港法治嘅招牌都褪晒色、爛蓉蓉。最近,律政司就招聘企業傳訊統籌主任,負責發展、推行同維持律政司整體企業傳訊策略,推動同統籌宣傳工作,同埋發展社交媒體策略等,職位月薪接近8萬港元。不過,律政司形象已經插水,究竟有幾多人仲願意走入呢個「熱廚房」呢﹖

鄭若驊帶領下嘅律政司甩轆事件多籮籮,包括濫用不誠實取用電腦罪,最終搞到十多宗法庭案件須改控其他控罪,甚至撤控。而之前一宗涉以假文件借貸嘅財務詐騙案,律政司「唔告貴利告債仔」,亦受法官斥責「檢控醜陋」。而政府修訂《逃犯條例》搞到一鑊粥,理應做好解說工作嘅鄭就被外界炮轟失職。連行政會議成員兼立法會議員葉劉淑儀都鬧爆政府,話政府解說工作做得太差,甚至連相關小冊子都係上周先收到,仲要成本教科書咁,質疑市民根本唔會有興趣睇。

解說、宣傳工作做得咁差,唔怪得要請人搞搞佢喇。律政司本月初就刊登招聘廣告,以月薪7.8萬多港元聘請企業傳訊統籌主任,係非公務員職位,工作包括制訂高質素、具考證同精心撰寫嘅宣傳品,喺各種傳統同電子社交媒體上發放宣傳文稿、刊物、線上或社交媒體資料、宣傳片、新聞通訊等。不過齋製作係唔夠嘅,仲要做好社交媒體策略,透過提高各社交媒體平台點擊率及公眾參與程度,增加公眾對部門認識,即係「呃like」。而應徵者需具備至少十年從事企業傳訊或公共事務經驗、優秀嘅中、英文講寫傳意技巧,以及有優秀策劃、組織技巧同操作社交媒體經驗,而有關申請喺下周四就截止。

律政司喺鄭若驊領導下問題多多,喺佢任內律政司已經有多人離職。如果真係加入律政司,救得火嚟都未必有閒暇去做其他宣傳工作喇。