政Whats噏:黃碧嬌轉軚 大埔區會拒論修例

2019年06月18日 21:58
東網電視
更多新聞短片
大埔區議會應集中處理大埔區內事務為先。

香港最近發生嘅事經常出現急速變化,跟得唔貼就會追唔到。話說大埔區議會主席黃碧嬌,本來打算批准該區民主派區議員討論反對修訂《逃犯條例》嘅動議,但今日(18日)同秘書處開會,檢視政府各部門嘅回應,發現議員質詢問題基本已有答案,最終拍板決定唔批准下月大會作相關討論。

黃碧嬌承認區議員提動議時間足夠,符合會議常規,本應打算同其他委員會一樣咁處理,但因為呢排修例事態發展急速,今日再同秘書處審議有關動議內容時,發現講及警方處理上周於金鐘發生衝突嘅手法,但警方日前召開記者會已經回應咗議員大部分問題,故認為不宜再喺大會討論。

佢又話相關警民衝突唔係喺大埔發生,警方都已經詳細回應,議員如有特別跟進可以同部門聯絡,甚至有投訴可按當局現行機制處理,希望大會集中處理大埔區內事務為先。