政Whats噏:莫錦貴首登主席台 唔願着西裝

20190619
東網電視
更多新聞短片
莫錦貴話要人尊重唔靠衣着,升呢後裝扮如昔。(陳嘉順攝)
沙田鄉事委員會主席莫錦貴本月初當選新界鄉議局副主席,尋日首次以副主席身份參加鄉議局執委會,不過佢就有別其餘兩位正副主席,以及前副主席張學明,莫錦貴冇着西裝開會,打扮依然同往日一樣。
莫錦貴話要得到他人尊重唔係靠衣服,而係自己本身,加上呢身打扮都見得人咁話。佢又講到,做咗副主席後都仍然要落鄉落村,自己多年嚟都習慣一早落村,過程少不免要擒高擒低,如果着西裝搞到成身汗好辛苦,直言做咗副主席唔代表唔使做。
以往坐台下長枱嘅佢,開會就長期望住對面位,依家上台開會就見到好多人,佢笑住話見到人多都有啲驚,但開會感覺都係一樣嘅。而為咗準備首次會議,佢話早早睇晒文件,至於會上發言就要睇時機,留返畀主席講。