政Whats噏：讀者嫌貴唔畀3蚊？　蘋果動新聞延至7月4日收費

壹傳媒旗下嘅《蘋果動新聞》近日打算唔再畀人免費閱讀，話要收3蚊先有得睇，但點知原本周一(17日)起收3蚊嘅cap水算盤，就改口話延至下月4號。唔通係壹傳媒發現市民覺得蘋果唔值得畀錢睇，3蚊都嫌多，搞到焗住要推遲收費？

《蘋果動新聞》聲稱要推出所謂新經營模式，先話要註冊登記，繼而就開始揚言要收費，打算由周一開始收3蚊，點知近日就話因應當前社會時局，等未升級嘅會員都繼續睇得到事態發展，所以下月4號下午先開始收3蚊，足足推遲咗兩個幾禮拜。

之前講咗咁耐收費，叫人用行動支持，依家突然要延遲，唔通係發現啲人唔多支持？講真嗰句，如果真係咁有信心收費嘅，又點會有理由拖延吖，可能係知道市民覺得咁嘅傳媒撐唔落，3蚊都嫌多，搞到唔敢收錢住啦！