政Whats噏︰反修例被鬧漢奸走狗　郭榮鏗收5億陰司紙

立法會民主派議員為力阻政府修訂《逃犯條例》多次搗亂議會，屬反對修例陣營嘅法律界立法會議員郭榮鏗，近日就收到一封內附陰司紙、用簡體字寫嘅信件，封信內容就係話郭「既做漢奸，又做走狗」，又話佢「逃犯條例事件中你很出力」，值得「獎利(勵)」，所以依家就「獎一筆獎金」畀佢喇。

郭榮鏗喺社交網站上載咗一張照片，照片中係一封夾附咗5張陰司紙嘅信件。佢仲留言話今日收到「5億」，又指「元朗天橋都17億啦」、「5億做得啲咩」，仲笑言要向立法會秘書處申報。至於有否就事件報警，佢肯定咁話我哋唔會報警㗎啦。

不過，今次已經唔係郭榮鏗第一次收到有陰司紙嘅信件喇，前年2月佢就喺新年流流收到陰司紙，當中仲有夾附信件鬧佢「格衰、樣衰」，又祝佢「新年一路走好」。