政Whats噏：侯志強自嘲一夜白髮　爆太太有怨言

唔少原居民嘅髮型都令人印象深刻，好似前十八鄉鄉事委員會主席梁福元就留咗多年嘅鬆糕頭，而上水鄉事委員會主席侯志強(侯強)就習慣向後梳，唔知鄉紳維持髮型不變係咪怕人哋唔認得喇！但侯強最近就有所變化，變嘅係髮色。

侯強髮色多數都係深啡色，過往未見過滿頭白髮嘅打扮，但早前見佢竟然多咗好多白頭髮，多咗陣滄桑感，佢就笑話自己一夜白髮，因為煩惱多，搞到從無白髮嘅佢一下子變白喎，仲話遲下會考慮染金做「金毛獅王」，真係信不信由你喇！

佢開完一輪玩笑後先肯認真，話以往都甚少染髮，自誇現時夠崇尚自然，反正自己做實事唔靠外表，仲話成日要去染髮好麻煩。不過，佢自爆太太對佢滿頭白髮有投訴，彈佢成個阿伯咁而想捉佢去染髮喎，唔知佢遲下會唔會聽太太話染返深色呢？