政Whats噏:鄧家彪細仔出世 8磅巨B似足媽咪

2019年06月26日 06:00
東網電視
更多新聞短片
鄧家彪抱仔個樣好甜。(受訪者提供)

勞工顧問委員會勞方委員鄧家彪(阿彪)嘅細仔尋日(25日)出世啦!相隔十年再做老竇,阿彪話囝囝重八磅兩安士,巨無霸咁,足秤又贅手,話呢隻豬年出世嘅豬仔果然係唔同啲㗎,真係可喜可賀。

阿彪話囝囝尋日朝早十點幾喺公立醫院出世,個樣似太太,至於大女就似佢,目前係一人似一個,但初生嬰兒個樣都未定,遲啲應該仲會變嘅。囝囝依家未改名,但打算同囡囡個名一樣,都係改單字,囡囡變家姐,仲已經抱過細佬嘞!

阿彪又話自覺好幸運,相隔咁多年再做爸爸,太太年紀唔係特別年輕,但生產過程好順利,最緊要就係母子平安吖嘛,又講起太太原本打算順產,後來醫生同護士覺得有啲風險,所以建議開刀生。佢大讚公立醫院水平好,醫護人員都好體貼同細心,提醒佢好多嘢喎。

對囝囝有乜期望?佢話依家最希望囝囝健健康康,將來就算面對大風大浪都頂得住,唔好失去自我咁話。