政Whats噏︰政府派錢一塌糊塗　葉劉促大方啲當利是派

去年政府嘅財政預算案被批評「派糖」不均、未能惠及基層，喺民怨沸騰下，政府先「跪低」補鑊，就透過關愛共享計劃向合資格嘅市民每人派錢4000港元。不過呢項派錢措施就拖足一年都未完成工作，由今年2月開始接受申請至今，甩轆不絕，真係惠民措施都變擾民措施。今日(26日)有立法會議員就派錢措施提出口頭質詢，鬧爆政府派錢派到一塌糊塗，連身兼行政會議成員嘅立法會議員葉劉淑儀(葉劉)都叫政府好心就大方啲，仲話應該「人人都係當封利是咁派」添。

政府派4000元措施喺派表同收表嘅過程都頻頻「甩轆」，立法會議員鄺俊宇(Roy)今日喺立法會大會就派4000元措施提出口頭質詢。回應質詢嘅財經事務及庫務局局長劉怡翔就話，職家庭津貼辦事處接到7000宗個案指未有收到確認申請，當中有一成係冇收到申請嘅，會容許呢啲市民補交。而職津處現時每日可向約2.8萬宗成功申請個案發放款額，而截至本周二(25日)為止，已經向超過61.7萬名成功申請嘅市民發放款額，最新目標係喺今年9月底前完成處理所有申請。換言之，部分已申請嘅市民仲有排等喇。

Roy喺會上就鬧爆政府派錢都差唔多派足半年、仲要派到一塌糊塗，搞到市民一肚氣。佢又批評，政府嘅派錢安排混亂，期間仲多次傳出職津處有遺失表格事宜、甚至出現離職潮等消息，認為搞到咁，政府應該向市民道歉咁話。

而葉劉亦都有出聲，話今次派錢係「執漏」，派得較為「論盡」，仲問政府會唔會吸取教訓添。葉劉仲話，政府日後喺有盈餘嘅情況下，就要「大方啲，一早派」，「人人都係當封利是咁派」，咁樣做法又會簡單啲，政府亦可以節省行政費喎。

不過，劉怡翔就話，政府每年都會根據財政預算嘅情況、當時嘅公共財政情況、同埋社會訴求去制訂措施嘅。關愛共享計劃素來係具針對性嘅措施，如果喺其他方面已享有寬減措施或已經受惠，就唔應該雙重受惠喇。根據當局嘅回應，葉劉建議都係嘥氣，查實如果政府真係識吸取教訓，好多事都唔會重蹈覆轍，吓吓激到市民上街喇。