政Whats噏︰見立會實習學生　葉建源乘機收集意見

依家正值實習季節，立法會秘書處都有一班大專實習同學仔，尋日(26日)仲有同議員傾下計添。教育界議員葉建源都有現身，仲收集同學對香港教育制度嘅用家意見，唔知呢班用家有冇乘機投訴呢？據知，投訴又唔算嘅，佢哋只係覺得壓力大，課程創意低，由細到大都好多考試咁囉。

葉建源就同學生講，其他國家覺得香港成績好，而成績好真係有代價，如果制度可以減少啲壓力會好好多。外界成日話通識科令學生變得激進，但啲同學仔話冇咁嘅感覺，其實通識科只係令大家對時事關注多咗，唔會引導大家有特定嘅立場。

今次嘅活動大約一小時，大會叫議員以「人生轉捩點」作題目講吓，葉就講起當年參選立法會係重大轉變，覺得多年關心時政同喺教育工作方面累積嘅經驗，令佢準備好做議員咁話。睇番當年葉臨危受命突然要參選，唔怪得佢會認為呢個係人生轉捩點喇。