政Whats噏:冼漢廸批莫乃光忙社運多過代表業界

20190712
東網電視
更多新聞短片
冼漢廸認為香港要追上創科發展,最重要係要政府做好諮詢。(溫國佳攝)
科技發展可謂世界潮流,全球各地都爭相喺呢方面搶人才;不過,香港就被人話發展慢話咗好多年,搞到業界對立法會資訊科技界議員莫乃光都有啲意見。互聯網專業協會(iProA)會長冼漢廸今日(12日)就話,近年莫似係參與社會運動嘅議員,多過似係業界代表,希望莫嚟緊可以多番啲為業界發聲,事關資訊科技界都有好多嘢,例如電競,等緊法例拆牆鬆綁先可以做得好!
政府方面,冼就話如果香港要追番上其他地方,都有方法可以追到,不過最重要係要政府做好諮詢,例如近年落實嘅智慧燈柱,可能加個鏡頭都足以令唔少市民擔心私隱問題,政府一定要了解吓市民可接受嘅程度去到邊,喺市民私隱同收集資料、監控路面等之間做好平衡至得。
此外,冼又建議業界年輕人多啲闖出香港,事關香港市場太細,若果有年輕人對內地反感,都可以選擇美國或者其他地方,咁就有多啲機會。冼仲大爆自己當年完全唔識普通話都返咗內地發展,初初啲人好難先聽得明佢講乜,不過後尾冼發現,其實四川人、福建人等講普通話都好重鄉音,聽佢哋講其實都聽得好辛苦,結果佢諗通咗之後就放膽佢嘅粵式普通話,時至今日雖然都仲係唔標準,但基本溝通已經冇咩問題嘞。