政Whats噏：王梓軒開演唱會　父王英偉自行撲飛撐場

明星嘅父母都冇特權㗎，好似歌手王梓軒即將開個人演唱會，佢嘅爸爸、藝術發展局主席王英偉昨日(12日)出席一個藝術展時，講起自己都打算撐場支持下囝囝，但係就話要自己撲飛喎！

王英偉話，自己喺演唱會唯一會幫手嘅就係撐場嘞，佢話阿仔大個仔，乜都自己搞得掂啦，做父母嘅咪去撐場支持吓囉，親身去就係最大嘅支持啦。聽落都對阿仔幾有信心咁！咁阿仔有冇留定飛呢？佢就話冇特別優待㗎，上次都係自己去撲飛㗎。嘩，依家啲演唱會飛咁難買，希望佢成功撲飛啦！

暑假又到，好多人都鍾意去吓旅行。王英偉就講起，啱啱去完西班牙同葡萄牙，參觀當地嘅酒莊同睇吓一啲特色建築物，佢話好鍾意歐洲，每年都會去，去旅行最鍾意就係睇風景同埋食當地嘅美食，仲話唔使自己做資料搜集㗎，因為好多朋友都會同佢推介當地嘅米芝蓮餐廳咁話。