政Whats噏:公僕扣遞增薪額方案多波折 羅智光頭痕

2019年07月13日 21:35
東網電視
更多新聞短片
公務員加薪扣遞增薪額頂方案波折重重。(設計圖片)

公務員團體近年一直不滿薪酬調整計算方法中,扣減遞增薪額數字太高,影響加薪幅度。新一屆政府上場以來,公務員事務局局長羅智光一直同公務員團體商討,今年終於爭取到將扣減遞增薪額數字「封頂」,點知公布方案時正值連串大型示威浪潮開始,令外界頂多知道公務員今年較原定加多咗人工,唔多知道出現呢個影響深遠嘅方案,當局正式問立法會攞錢加人工又遇着立法會受嚴重衝擊,暑假前攞唔到撥款。羅智光幾經辛苦搞出嚟嘅方案真係波折重重,公務員團體促請佢喺10月復會時第一時間申請撥款,但依家嘅政治環境,今日唔知聽日事,10月係咪順利開到會呢?

公務員薪酬調整計算方式係以薪酬趨勢總指標,扣減遞增薪額,計出薪酬趨勢淨指標,呢個淨指標就幾乎等同公務員每年加薪幅度。近年正值公務員退休潮,加上政府希望擴大公務員團隊,請多啲新人,兩者都影響到遞增薪額數字不斷飆升,等同令淨指標下降,影響加薪幅度。因此公務員團體近年一直爭取調整計算遞增薪額數字嘅方式,甚至曾要求取消扣減遞增薪額數字,至於喺今年最終推出嘅「封頂」方案,就係以多年嘅數字計算平均遞增薪額開支,就扣減「封頂」。

高級公務員協會主席黃孔樂指,今次同當局達成共識嘅方案,往後幾年都可以使用,咁就可以減低近年遞增薪額數字不斷上升嘅影響,希望可以換取多啲時間,與當局商討係咪可以長遠檢討整個計算公務員薪酬嘅方式。對於近日立法會被示威者衝擊,搞到財委會開唔到會,公務員加薪方案未能喺暑假通過。黃強調,唔想就事件火上加油,理解有公務員因為要延遲加人工而唔開心,希望當局喺十月復會後第一時間將方案交上財委會,但亦明白有唔少工程等緊撥款。佢話,羅智光等今屆官員對公務員嘅多個訴求,處理得較有效率,今次「封頂」方案得來不易,只能希望復會後盡快通過。

第一標準薪級公務員評議會職方主席林榮松話,爭取咗「封頂」好多年,依家喺暑假前通過唔到撥款,真係相當可惜,基層公務員原本希望暑假前加薪,咁就有筆錢可以畀小朋友開學買書簿等,但亦明白依家嘅社會氣氛好困難,加上好多工程等緊通過,惟有希望社會氣氛盡快平復,重回正軌,公務員可以喺今年內加到人工。

講真嗰句,羅智光幾經辛苦才同啲公務員團體達成共識,推出呢個「封頂」方案,點知就波折重重,10月如果未能順利復會,到時影響到班公務員,就真係連累唔少人喇!