港故:三女創免費運動群 鼓勵街坊同做運動強身健心

2019年07月14日 12:00
東網電視
更多新聞短片
「HK Bootcamp」發起人Debbie、Emily與Claudia,希望鼓勵街坊跳出舒適圈。(王鏡文攝)

不少人做運動都是想有更強健的體魄,這集《港。故》活力十足的主角,除了想健身外,也希望能強化其他人的心靈。

Emily、Debbie與Claudia是「HK Bootcamp」的發起人,會定期舉行各類免費的街頭運動,並於她們社交網站的專頁廣邀任何人參與。她們本身互不相識,也不是專業的教練,初心也只是希望相約一起做運動,及後才慢慢地邀請其他人加入,一起感受運動帶來的正能量。

兩年多前,來自荷蘭的Emily到港讀書,因為想認識新朋友及融入社區,熱愛運動的她就在社交網站的地區群組發帖招友,於是找到了Debbie與Claudia,她們兩人都因為工作的壓力,及想有更健康的身體而做運動,卻在獨自運動中有不快的經歷。

健身室氛圍逼人 自組活動力求正面

Debbie曾經在健身室健身,認為當中的風氣令人很壓抑,「好多時都會聽到唔係咁鼓勵嘅說話,譬如會話你邊度肥、話你唔應該跑步,應該做咩,最後可能只係想推銷課程,會令人低落,唔想再做運動、逃避。」因此在自己成立的組織,三人都強調正向鼓勵,希望參加者安心嘗試,「我哋喺Bootcamp從來都唔會有人取笑你唔得、你好慢、你好肥、你好瘦嗰啲,完全唔會。」

知道街坊們水平有別,負責設計活動內容的Emily,也不會勉強參加者做到所有動作,「一開始都會同大家講,如果攰可以完全唔理我哋,可以休息、可以飲水。」因為三人都只是想參加者踏出第一步去嘗試,及慢慢培養做運動的習慣,「見證過好多由唔敢做運動、唔敢跳、覺得自己唔得、無笑容、好驚,到後來慢慢進步,或者幫佢哋建立自信心,希望有空間令佢哋變得更好。」Debbie補充。

由運動夥伴變好友 人情味濃郁

有着互相鼓勵的氛圍,令三名發起人及參加者的關係,不再局限於運動夥伴,一開始只是想減肥的Claudia直言,現在來Bootcamp最重要是想見到一班朋友,「我哋已經到咗攬頭攬頸嘅階段,大家都會好關心大家嘅生活,或者工作上嘅都希望可以一齊分擔。」三人都認為這比成功舉辦活動更重要,「呢份人情味係我哋Bootcamp一個好大嘅得着,其實人同人之間應該有咁嘅連繫,只不過係大家嘅壓力或者工作,令大家可能暫時忘記咗,好希望重新喚醒大家,其實身邊每一個人都有愛。」Debbie笑言。

望活動遍地開花 團結港人

三人成立的社交網站專頁,早前突破一千個讚好,成員都兌現承諾,在街坊面前做一千下「波比跳」(Burpees),挑戰自己體能極限,「希望畀到一個好正面嘅榜樣,鼓勵大家去嘗試跳出舒適圈、去接受一啲挑戰,希望將呢個訊息帶畀like咗我哋page嘅人。」完成挑戰後的Debbie激動地說。

那天她們也再一次感受到街坊的愛,「有好多朋友嚟探我哋,買咗成堆水、寶礦力,受傷又有人幫我哋包紮、想買手套畀我哋,其實呢啲都係人情味,係我哋Bootcamp換返嚟,所以我哋希望可以保持落去,更多人加入去感受我哋呢份愛。」

三人都認為香港生活太緊張,長遠希望各區都有參加者,再自行舉辦活動,鼓勵運動之餘也將人情味帶到各區,「可能好多人金錢上有壓力、生活上有壓力,我哋希望將呢個Bootcamp嘅形式帶到每一個地區,令香港有更多呢種文化可以團結一齊,我哋三個嘅小小力量雖然唔係好大,但希望用我哋最大嘅努力去聯繫到香港人,慢慢攜手建立更好嘅地方。」Debbie盼望。

今集《港。故》用6分半鐘,帶大家參加充滿人情味的「HK Bootcamp」,健身之餘亦希望用愛來治癒大家的心靈。

-------------
《港。故》:東網每周專題習作,講故事、講香港人的故事。
Fb:http://bit.ly/oncckonggu_Fb 
IG:http://bit.ly/oncckonggu_IG 
Youtube:http://bit.ly/oncckonggu_Youtube