政Whats噏:同鄺俊宇突變hehe 鄭松泰:玩下無所謂

2019年07月16日 14:52
東網電視
更多新聞短片
有網民將鄭松泰(左)同鄺俊宇(右)嘅相放埋一齊,惹起網友熱議。(互聯網)

立法會有一個「出櫃」嘅議員陳志全(慢必),近日又多咗對CP(Couple、情侶),民主黨(白鴿黨)嘅鄺俊宇(鄺仔)同熱血公民嘅鄭松泰(泰博)突變hehe,仲開咗網頁,講明係追蹤佢哋添!

泰博今日(16日)喺Facebook貼文同上載咗張相,話有唔少網友講佢知,發現咗一個名為「為泰博鄺仔打call彈彈hehe團 」嘅網頁。而泰博就話可能係支持者見最近好多朋友精神繃緊,希望大家笑一笑罷嘞!佢仲話「我有老婆有泰妹,應該唔會引起誤會,玩吓無所謂,只怕鄺神(鄺仔)唔高興」。泰妹?大家唔好誤會,泰妹係佢囡囡,唔係另一條女。

呢個Pose出咗街,惹起網友熱議,毀譽參半。雖然泰博話有老婆同囡囡,唔係hehe,但有網民就話「有老婆都可以的」,甚至話「老婆只是掩飾!」擺明玩佢,亦有心水清嘅網友就留言「玩吓唔係無所謂,呢個玩膠同當年金鐘hehe一樣,唔好畀佢發大。」仲記得2014年違法佔領行動期間,時任嘅學聯秘書長周永康同副秘書長岑傲暉,就係被塑造成hehe。

睇番網頁張圖將佢同鄺仔嘅相擺埋一齊,兩人都笑得幾溫柔㗎!唔少網友讚泰博同鄺仔好襯,但亦有網友問「將你同佢放喺一齊,你有冇嘔?」亦有網友話「算啦……民主黨係鄺囝(仔)㗎啦!唔通鄭松泰想揀林卓廷咩?有網友就為鄺仔平反,話「鄺神(仔)同泰博個樣差咁遠,對鄺神(仔)唔公平。」