政Whats噏:哈佛小甜甜拍短片 為區議會流會道歉

2019年07月16日 18:10
東網電視
更多新聞短片
任葆琳喺短片中為區議會流會道歉。(互聯網)

南區區議會喺月初因法定人數不足流會,無法討論由民主派區議員提出嘅反修訂《逃犯條例》嘅議程,繼建制派區議員事後解釋各有缺席原因後,當日趕返會議室卻已宣布流會嘅區議員、有「哈佛小甜甜」之稱嘅任葆琳,近日喺Facebook(fb)上載短片,為流會道歉。

區議會主席朱慶虹喺當日嘅會議上話等多15分鐘,但夠鐘仍未夠法定人數開會而宣布流會,由於當時大部分建制派區議員都唔在席,被質疑係避開討論反修例,而喺流會後先到場嘅任葆琳亦有即場向傳媒解釋遲到原因。

近日佢拍咗段短片上載fb,話因應街坊建議澄清下近日發生嘅事。佢喺短片中為流會道歉,話當日早上喺議員辦事處與同事工作,突然有一名市民喺冇預約嘅情況下上門求助,因而連中午嘅議員飯敍都冇出席,而喺趕返會議室途中,亦先後傳短訊畀民政事務專員同主席,但最終都係趕唔切。

佢強調係無黨派嘅獨立議員,重申反對倉卒同未釋除市民憂慮情況下修例,指區內嘅連儂牆曾發生縱火事件,而佢嘅橫額亦遭破壞,直言呢啲刑事行為唔能夠接受,又話喺呢段期間不斷被人評頭品足,由頭髮評到落腳趾尾,承受好大壓力,幸有好多街坊給予支持而感到好開心。