政Whats噏:劉鎮漢8月離職 無工一身輕

2019年07月20日 01:00
東網電視
更多新聞短片
劉鎮漢將於8月底卸任,開始退休生活,難怪笑得開懷。(陳素貞攝)

俗語有云:「無官一身輕!」旅遊發展局總幹事劉鎮漢就無工一身輕,將於8月底離任工作了12年的旅發局,展開退休生活,享受人生,會先去加拿大探望兒子,再唔使為近期旅客增長放緩而頭痛。旅發局主席彭耀佳就話曾多番挽留劉,不過始終不及劉太咁吸引,劉去意已決,終可由搞旅遊,變為真正享受旅遊。

劉鎮漢原定7月底離任,不過仍有部分工作要處理,延遲一個月先走人,佢話9月一定要走。點解?原來係佢喺多倫多工作嘅兒子要派駐海外半年,廿四孝嘅老竇掛住阿仔,一定要9月離任去探仔,唔可以再延長留低。

唔講你唔知,劉鎮漢果然唔簡單,任職總幹事12年間,先後跟隨過3位旅發局主席,與5位商務及經濟發展局局長及4位旅遊事務專員交手,為旅發局爭取到唔少資源。

至於劉嘅繼任人選搵到未?彭主席話透過公開招聘同獵頭公司搵人,需要一定程序,最後才交給董事會,不過,佢就話應徵者眾,要揀選一位有番咁上下辦事能力嘅人係需要時間,至於會否最後請咗位外國人,佢就話請人無設限。