政Whats噏:同枱食飯笑晒口 狄志遠黃成智擺和頭酒?

20190721
東網電視
更多新聞短片
狄志遠(左一)、李立航(左二)、陳漢林(右三)同黃成智(右一)同枱食飯,細說當年。(互聯網)
狄志遠同黃成智喺2015年9月退出民主黨(白鴿黨)後,另起爐灶創立「新思維」,但黃因不獲黨內支持參選立法會社會福利界功能界別而退黨,其後又因透過新思維傳媒群組發放個人社企消息,被狄志遠「秒踢」,令呢對兄弟不咬弦浮面。然而,近日佢哋又同枱食飯喎,唔通擺和頭酒?
話說狄志遠日前喺Facebook上載一張相,見到佢同黃成智,李立航同陳漢林同枱食飯。李立航做過沙田區議員,後來退出白鴿黨,之後去咗北區做地區服務,而陳漢林亦曾經喺北區服務過。
照片所見,滿桌佳餚,佢哋一邊食,一邊嗒茅台,大家滿臉笑容,睇嚟食得好開心。原來呢餐係上海家庭菜,由狄志遠炮製,而陳漢林就煮雪菜火鴨絲伊麵。狄仲貼文話「當年,大家都在北區服務,現在都從過往崗位退下來,細說當年,仍然一番滋味。」
問到張相好似擺和頭酒咁,狄志遠話當然唔係喇,仲話佢哋經常聚埋嘅。再追問有冇再諗住再戰立法會,佢話應該唔會嘞!見新思維冇乜聲氣,咁有冇新部署呢?佢就話退休嘞,冇部署。政治一日都嫌長,狄黃喺咪全身而退,大家拭目以待嘞!