政Whats噏:葉劉倡全民派$8000 田北辰隔空寸爆

2019年07月23日 12:24
東網電視
更多新聞短片
葉劉搶閘倡全民派$8000,畀田北辰隔空寸爆。(設計圖片)

開講有話「有錢使得鬼推磨」,近年庫房水浸,每逢預算案前夕都會有政黨叫價嗌派錢。舊年聲稱派錢只能帶來一次性消費,解決唔到香港急切問題嘅新民黨主席葉劉淑儀(葉劉),眼見社會立立亂,提早半年約見財政司司長陳茂波(波叔)傾預算案,仲反高潮主動建議全民派8000蚊。令到坊間不斷猜測佢真正用意,連前黨友、實政圓桌田北辰都即刻割席潑冷水,寸爆話:「失民心者派八千?」

每年暑期各政黨都開始就10月份出台嘅施政報告提建議,仲會約見特首傾吓計,到年底時見財政司司長就明年初嘅預算案畀意見。今日(23日)新民黨見波叔,大家以為可能係傾施政報告喇,但葉劉經多番追問下,強調係自己主動約波叔,話預見到今年經濟衰退嚴重,再加上近期嘅衝突影響,所以要早啲畀意見喎。

新民黨合共提出七項建議,首當其衝、至為重要就係向18歲以上嘅永久居民發放8000蚊現金津貼;取消卓越獎學金計劃的限額;增加香港應用科技研究院資助額至3億港元;喺多項支援中小微企計劃中,減費降息一年;寬免短期租約的25%租金,為期半年;豁免營業車輛一年內驗車費;豁免旅行社、酒店、旅館、酒吧、食肆及小販一年牌費。

葉劉不斷強調,有預預測指今年經濟增長率可能得1%,加埋社會動盪有衝突,中美貿易談判未明朗,經濟下行風險大,種種問題早已影響緊基層生活,形容人人有錢分就實際啲、開心啲,話對市民實有幫助喎。咁擔唔擔心有人用錢買抗爭物資?佢就話唔覺得個個都會買頭盔,而且就算真係派錢都係明年嘅事,只係提早叫波叔考慮吓要唔要做。

有錢派嘅消息迅間引起民間哄動,有網民就搵到田北辰幾年前同葉劉見高官嘅相,田北辰就立即喺社交網站發貼,澄清自己兩年前已退咗黨,依家所屬政黨係實政圓桌。佢仲將網民留言截圖話新民黨係想收買人心,笑言網民都醒過身為行會成員嘅葉劉,而且如果大家收到錢,相信會派番畀政府,叫當局成立獨立調查委員會好過喎,明寸葉劉嘅建議唔掂幫倒忙。

相信市民唔會抗拒政府派錢,之但係以波叔撳住荷包做守財奴,市民鬧爆佢先肯透過關愛共享計劃派4000蚊,仲要派到天怒人怨,試問有冇咁易畀葉劉撬得開政府金庫呀?