政Whats噏：落場救人見證衝突　陳沛然形容似戰地醫生

醫生要開刀做手術見慣大場面，對於普通流血應見慣不怪。近來唔少示威遊行都爆發衝突，最終流血收場，醫學界立法會議員陳沛然（Pierre）話，佢自己落到場見到傷者時，同普羅大眾一樣，都係戰戰兢兢喎，點解呢﹖

Pierre日前寫網誌時講到近來社會狀況，話自己冇參與遊行，只係喺現場巡視，等一旦有意外時，至少有個醫生幫手，更直言可以幫得幾多得幾多。佢又提到，上周六(27日)去元朗時真係覺得驚，擔心人同車都唔能夠成功逃脫喎。而佢就選擇帶住議員證，拍拍心口，照顧自己、傷者同義務醫護人員嘅安全。

至於點解有醫生在場會好啲，佢解釋，現場有複雜個案，試過有人被誤診爆肺，經檢查後發現只係過度換氣症候群，一個紙袋就搞掂，但亦有人被以為血糖低而暈咗，最後原來係中風，所以佢話自己同大家一樣，落地都感覺戰戰兢兢，亦希望保持住一顆赤子之心，好似童話故事《國王的新衣》入面嘅小男童咁，勇敢地站出來。