政Whats噏：地區問題多　陳帆頻頻畀人捉落區

做政府高官最重要就係掌握民情，所以定期落區係必須要做嘅事，不過如果地區問題太多，成日落區都咪話唔頻撲！好似運輸及房屋局局長陳帆喺7月中先至被立法會議員陳恒鑌(Ben)捉咗落東北葵附近巡視，點知轉個頭就被另一議員葛珮帆(EQ)捉咗落將軍澳、沙田、馬鞍山，真係忙喇！

Ben同佢嘅團隊早排就帶咗陳帆落區睇街市同路邊設施，今次被EQ捉落新界東，就睇屋邨、商場嘅無障礙設施、公共屋邨鼠患等問題。EQ話，其實現時好多區嘅屋邨、商場、公共運輸設施等都缺乏無障礙設施，當中包括缺乏斜台、電梯工程進度緩慢等，搞到長者成日都要行樓梯，經常受傷。

至於鼠患問題，EQ指有啲公共屋邨嘅垃圾桶係「無蓋無底」，吸引老鼠覓食，叫政府換一個有蓋嘅密封垃圾桶先得。此外仲有行人天橋漏水、巴士總站路面斜路過斜等問題，聽落好似成個社區都係問題咁，雖然陳帆有表示積極跟進，不過都希望佢快啲落手，唔好拖成十年八載先搞得掂。