政Whats噏：李國麟離開公大　食完最後晚餐再派散水餅

快樂嘅時光過得特別快，又係時候講拜拜。身兼香港公開大學護理及健康學院院長嘅立法會衞生服務界議員李國麟(Joseph)，尋日(10日)就喺公大嘅飯堂食「最後晩餐」，今日(11日)仲喺「名師」指導下，自製咗曲奇餅，聽日(12日)就返公大派散水餅。

Joseph嘅「最後晚餐」係栗子炆雞，有湯、有飯兼有嘢飲。當佢將幅相上載Facebook，有網友就好關注，到底呢餐要幾多錢？佢話喺嗰度食咗廿幾年，同飯堂職員好熟，咁啱嗰日做得夜咗，咪喺飯堂食埋飯囉！佢話佢因為有職員價，餐飯只係30幾蚊啫！睇怕佢離開咗公大，就食唔到咁平嘅嘢嘞！

其實後日(13日)先係佢嘅Last Day，而今日佢就喺「名師」指導下，親手趕製咗幾款曲奇餅，包括無花果味、椰絲同榛子味，仲有芝麻脆添，合共四款，聽日就會拎返公大送畀啲教職員，當係散水餅，而佢亦嗌咗到會，到時同大家擦餐飽兼Say Goodbye。

雖然離開公大，但Joseph未必可以全身而退，事關校方亦已經開聲叫佢日後有時間就返嚟教吓書，仲計劃頒個榮休教授銜畀佢，話晒係佢一手創立護理系嘅，所以佢話只要一吹雞，就即刻返嚟幫拖。