政Whats噏：負面情緒嚴重　潘佩璆五招教紓緩

最近反對修訂《逃犯條例》嘅示威遊行逾演逾烈，好多人都因爲擔心社會亂局或者同家人嘅意見不同而出現負面情緒，立法會前議員潘佩璆就拍片教大家五招用嚟紓緩負面情緒，希望大家可以試吓同埋幫吓自己。

潘佩璆冇做議員之後，曾經出任聯合醫院嘅精神科顧問醫生，當然好擔心依家社會嚴重撕裂而引起嘅情緒問題，近日佢拍咗段短片，嘗試用正向心理學嘅半杯水理論教大家諗嘢正面啲。

佢話思想正面係可以應付情緒緊張問題，跟住佢仲教大家五種方法去面對負面情緒，包括深呼吸，放慢呼吸嘅節奏；逐步放鬆自己局部嘅肌肉，示範緊握拳頭，然後慢慢放鬆；將注意力放喺身邊某啲事物，唔好諗咁多；多做運動，因為運動產生嘅胺多酚可以令人放鬆；試吓同朋友分享，互相分擔。

佢好希望藉住呢段短片，提醒大家乜嘢係最重要，一家人應該同舟共濟，希望呢幾個小方法可以幫到大家。