網民熱話:公屋阿姐投訴服務不周 職員霸氣反擊敗走

2019年08月16日 07:00
東網電視
更多新聞短片
有公屋女住戶大鬧屋邨辦事處,結果被職員反駁得黯然離開。

從事物業管理,總會遇上要求多多的麻煩住客。近日有公屋辦事處職員在網上分享,稱一位語帶鄉音的女住戶在辦事處大吵大鬧,原因是不滿職員只向其母親引路,卻未親身陪同前往,又指自己「有交租」出糧給職員,結果被職員霸氣反擊。

網民於周日(11日)向Facebook群組「西客之道 Hispitality Secret」投稿指,早前遇到一位婆婆到辦事處問路,事主將寫有地址和電話的紙條給予婆婆,又詳細解釋具體路線,百般交代,確認婆婆明白後便返回工作。

本以為事情已經完結,惟一小時後,婆婆女兒帶婆婆前來辦事處,該女子怪責職員「有無搞錯,唔陪婆婆到社署」、「你哋啲人廢㗎?唔識搵人陪佢去?」事主解釋人手所限,不能抽身,但該女子不接受,且態度十分囂張,指陪婆婆屬職員分內事,「佢嘅事就係屋邨事務,你一定要理」,事主反駁說:「作為女兒又唔陪媽媽去?...將責任推畀外人似乎說不過去」。

女子聞言大為不滿:「我有畀錢㗎!唔係你哋出糧出咩嘢?」事主按捺不住還擊,「小姐,你可能有誤解,公共房屋其實係政府提供嘅一種房屋福利,而你所畀嘅錢,係以一個優惠價錢嚟租房屋署嘅屋,連市值租金嘅三份之一都稱唔上。」又強調:「你交嘅係廉價租金唔係管理費。」最終,該名女子無言反駁,「嬲到出唔到聲」,「嘴唇都震埋」,只能黯然離開。

貼文發出後,網民大讚事主「好波」、「有霸氣有理據」、「野蠻人多的是」,有人更質疑身為女兒不陪母親,反怪責別人,「阿婆唔可以一個人去社署,你做女又畀佢一個人去屋邨辦事處」,認為責任不在事主身上,「阿婆蕩失路嘅責任關職員咩事?」

網民有話說:

Simon Lam:師兄果然係老手
Timothy Wong:自己唔陪阿媽,仲要覺得自己冇錯。
Clara Choi:話時話,其實政府係要補貼你哋所交嘅租,即係話你交嘅租連租你間屋都唔夠,何來仲可以出糧畀我哋?

※緊貼網民熱話,掌握最熱話題,請關注網民熱話fb:
http://on.fb.me/1L3m1ro