政Whats噏：美國過關搞兩粒半鐘　鍾國斌轉唔切機

立法會議員不時都應邀去世界各地唔同地方公務外訪，而呢幾日剛好有6名議員應美國國務院邀請，到當地出席首次舉行嘅《香港-美國立法機關交流團》。紡織及製衣界鍾國斌(Felix)都有份，但飛去美國一波幾折，仲搞到上唔到飛機。

Felix最新喺社交網站上載幾張相，見到開會場地風景怡人，綠草如茵，睇到都覺得心情輕鬆，大會又專程喺會議門口貼出一張印有大家名嘅名單歡迎出席會議添。不過，Felix話自己喺香港時間周一(19日)早上8點喺屋企出門口，去到美國蒙大拿州足足要26個鐘，期間喺三藩市國際機場都搞咗2個半鐘，令佢趕唔切轉機，大呻去到外國先發現香港好有效率，叫大家要好好珍惜啊。