政Whats噏:憲報指放9日假 陳帆取消休假照返工

2019年08月23日 10:30
東網電視
更多新聞短片
陳帆本周初決定取消休假。

一到暑假唔止係學生放假,就連政府高官都陸續排住隊放假,本來今次就到運輸及房屋局局長陳帆放假,原定喺下月2日趁住開學日先復工,但佢已取消休假,將會照常返工。

政府憲報今日(23日)公布,陳帆明日(24日)開始放9日假,下月2日先返工,喺佢休假期間,副局長蘇偉文將會署理埋局長嘅職務,然而陳帆本周初就決定取消休假,繼續返工。最近香港社會氣氛緊張,幾乎每個星期都有示威遊行,唔知佢取消休假,係怕令人以為放假避難,定還是係已經諗到解決困局嘅方法呢。

另外,兩位食物及衞生局常任秘書長亦輪流放假,喺上月18日已經開始放假嘅食衞局常秘(衞生)謝曼怡,已經喺本周二(20日)返工,放成一個月假。食衞局常秘(食物)容偉雄就喺本周一(19日)開始放假,期間由副秘(食物)鄭鍾偉兼任職務,但就未知幾時放完假,唔知會唔會又放成個月呢?