政Whats噏：成功爭取撤回修例？梁美芬：唔好玩我

議員其中一個職責就係幫市民爭取福利，所以一旦「成功爭取」經常都會高調宣傳，不過今次「成功爭取」就個個都唔敢認喇！事緣昨日(4日)政府宣布撤回修訂《逃犯條例》，結果網絡上就陸續出現各建制派「成功爭取」嘅邀功圖，網民更大肆揶揄過往支持修例嘅建制派，嘲笑佢哋轉軚「抽水」，但建制派好快都出嚟澄清，指網絡上係改圖，佢哋冇出嚟「成功爭取」，其中大律師兼立法會議員梁美芬（Priscilla）更直言：「大家高抬貴手，唔好玩我啦！」

Priscilla係其中一個「被成功爭取」嘅議員，佢今朝都有喺Facebook拍片回應，講明歡迎撤回，又出席電台節目，期間一度提過「用咗好大努力爭取撤回」，又曾用普通法說服內地專家同香港政府可能喺事件上有盲點，仲認為撤回已經遲咗，聽落的確似乎同示威者連月嚟嘅「撤回修例」訴求好相近。

雖然Priscilla冇直接提過「成功爭取」四個字，但可能上述言論已經足夠引起誤會，結果網絡上就出現話佢「成功爭取」嘅圖片，搞到佢都喺Facebook澄清，指有關圖片另有Logo，唔係佢製作，仲話「咁大頂帽我戴唔起」，叫「大家高抬貴手，唔好玩我啦！」

「被成功爭取」嘅就仲有政黨民建聯，網絡上流傳一張佢哋召開記者招待會嘅圖，背景上寫有「成功爭取政府撤回逃犯修訂條例」，有四名該黨立法會議員出席，當中包括陳克勤同鄭泳舜，但佢哋喺Facebook貼出真假兩張圖澄清，喺真圖可見佢哋回應撤回修例嘅記招上，背景並無任何成功爭取字句，陳鄭二人亦唔在場，在場嘅係另一議員張國鈞。

不過，網民似乎就懶理佢哋嘅澄清，唔少留言都係「感謝」或「讚揚」佢哋嘅付出，講到建制派同示威者同一陣線咁，有部份仲叫佢哋繼續爭取成立獨立調查委員會，查實呢點Priscilla喺短片中都有提到，講明覺得獨立調查警察唔公道，認為個別警察嘅案件應交由監警會處理，不過睇落就冇幾多網民有認真回應呢一點喇！