政Whats噏：難得唔使嗌交　何君堯睇人放模型船

近幾個月修訂《逃犯條例》引起社會極大爭議，立法會議員何君堯日日忙住同人「舌戰」，今日(8日)難得有時間抖一抖、叉叉電，就去咗屯門公園視察區議會活動，見到人喺水池邊玩模型船，佢突然感觸話「似再續童年夢」。

何君堯喺社交平台上傳咗幾張屯門公園嘅相，見有好多人喺度玩模型船，佢仲喺水塘邊自拍咗幾張，睇嚟心情唔錯喎。佢話今日見到模型船愛好者好似再續童年夢，又話見到樹木茂密、小橋流水、景色優美，係賞心樂事，大讚屯門公園老少咸宜，推薦大家嚟。

有網友勸佢「心情放鬆一點，身體要緊」，但同時亦有人話佢其實去逃避現實，去咗屯門公園「污染環境」喎。