政Whats噏:畫像消失 立法會斬腳趾避沙蟲

2019年09月11日 19:37
東網電視
更多新聞短片
日後立會大樓唔再掛畫像,予人斬腳趾避沙蟲嘅感覺。(設計圖片)
立法會大樓今年7.1遭受反對修訂《逃犯條例》嘅示威者衝擊同佔領,大樓建築同內部都受到嚴重破壞,包括歷屆立法會主席畫像,立法會至今無法正常運作,提早休會放暑假。現時大樓正進行復修工程,不過聽聞被惡意破壞嘅畫像日後唔會再掛起,呢啲叫唔叫做斬腳趾避沙蟲呢?
大批示威者喺7.1當日闖入立法會,其中位於一樓嘅會議廳成為重災區,多處被塗鴉破壞,議員座位嘅投票按鈕被拆毀,亦有文件被撕到爛晒。會議廳外展示嘅歷屆立法會主席畫像都成為發洩對象,其中現任主席梁君彥嘅畫像就被人拆下塗污,再遭人用金屬物擊毀,最後畫像畀人置喺地上盡情用腳踐踏,原本掛上畫像嘅牆壁更遭人噴上「奠」字。堂堂立法會主席畀人玩到咁,真係乜架都丟晒。
梁君彥事後都話過傷心、心痛,但對畫像有咁嘅下場就好豁達話冇乜所謂,直指畫像可以掛番上去喎。另外一位同「受害」嘅前立法會主席就形容畫像事件只屬小事,講到搬入現時大樓後先有展示歷屆主席畫像嘅做法,佢都冇揀過展出嘅畫像款式,整爛都唔緊要喎。
然而呢種只屬小事、整爛都冇所謂嘅說法似乎並非心底話,因為始終關乎議會尊嚴。有建制派議員直言,竟然有部分畫像被掉喺街邊咁冇面,所以立法會大樓未來唔會再展示歷屆立法會主席畫像。不過講真,要發洩、侮辱唔一定要畫像,呢個改動好似有啲多餘。
不過,有指改變做法亦涉另一個現實問題,就係會議廳外嘅走廊牆壁位置已掛咗五幅畫像,再加埋一個列有歷屆主席姓名同年份嘅木匾,牆壁空間已接近飽和,所以改動都係因應現實需要,但會繼續展示名字木匾。類似做法同政府部門一樣,就如刻上歷任財政司司長姓名嘅木匾都係唔會有畫像。
其實立法會搬入現有大樓前,係冇展示歷屆立法會主席畫像嘅做法,當年只會展示刻有歷任主席姓名嘅木匾,如果立法會復修後唔放畫像都係還原基本步,不過就予人斬腳趾避沙蟲,甚至係走回頭路嘅感覺喇。不過,立法會秘書處就話歷屆主席畫像正在復修中,計劃維修工程後都會繼續展示喎,咁就睇下到時整成點喇。