政Whats噏:葉劉當面話羅范 免費性愛論不恰當

20190912
東網電視
更多新聞短片
葉劉淑儀(左)曾當面斥羅范椒芬(右)言論不恰當。
行政會議成員羅范椒芬周一(9日)發表令人譁然嘅言論,指有證據證明有少女被誤導而為前線示威者提供免費性愛。早前有兩名新民黨區議員發聲明,要求羅范椒芬致歉,而該黨主席、身兼行政會議同立法會議員葉劉淑儀更話,佢曾當面同羅范椒芬反映言論不恰當添!
葉劉話有關言論一出收到好多地區人士反映不滿,但認為以新民黨名義出聲明太嚴重,加上佢認識羅范多年,擔心會畀人有「建制派內訌」的觀感,所以就容許黨內人士以個人身份各自表達意見。
雖然該黨無出聲明要求羅范收回言論,但葉劉就話早就當面同對方反映發表呢啲言論不恰當,因為會令坊間以為行會成員好無知,人講就信。葉劉仲話,現時每日都收到大量信息,涉及輪姦、死亡等,所以現時就算有真人佩戴口罩開記者會,佢都唔能夠核實,直言身為行會成員,將朋友嘅朋友所言當真去發表更係不智喎。
面對葉劉直接反映意見,羅范又接唔接受意見呢?葉劉就話對方堅持係真消息,估計羅范唔似得佢咁,每日收到大量古靈精怪嘅信息,仲叫羅范日後唔好再覆述呢啲消息添!