政Whats噏：謝偉銓讚芬蘭圖書館　香港可借鏡

講起公共圖書館，好多人都淨係諗到借書、借電腦用，但原來外國嘅圖書館有好多配套設施畀市民使用。立法會教育事務委員會去咗芬蘭考察，其中一日去咗赫爾辛基市內最大嘅公共圖書館——頌歌中央圖書館參觀，建築、測量、都市規劃及園境界議員謝偉銓(Tony)讚不絕口。

本身係測量師嘅Tony喺社交平台上傳咗幾張相，話頌歌圖書館擁有獨特嘅建築設計同創新科技，外牆主要用木材同玻璃構建、形成流線形設計，館內利用自然採光，裏面設有電影院、KTV、餐廳、3D打印機，真係令人羨慕呀！

Tony大讚圖書館升級至結合創科同生活嘅公共空間，仲話無論建築設計定係概念都有太多可以借鏡嘅地方，又話呢個圖書館對於香港有參考意義，因為係籌備多年嘅，圖書館嘅設計仲贏過獎添！

芬蘭考察行程相當緊湊，當日佢哋仲參觀咗日間幼兒中心，同埋參加咗芬蘭著名嘅教學活動，Tony話令人大開眼界，仲話會向外國嘅教育制度「取經」，就教育制度繼續進行意見交流喎。