政Whats噏︰林鄭鬼祟落耀東邨派月餅　走後門避傳媒

修訂《逃犯條例》搞到香港四分五裂，最近先肯跪低撤回修例嘅特首林鄭月娥自然成為過街老鼠，龜縮唔敢面向公眾。不過，唔知係咪中秋節嘅關係，佢竟然今日(13日)下晝落咗筲箕灣耀東邨一間安老院探訪長者兼派月餅，諗住趁佳節少啲怨氣唔會畀人圍，點知幾十個街坊知道消息後，立即走去老人院正門，諗住「慰問」佢，搞到成個老人院門口都係市民同傳媒。

林鄭可能知衰費事搞場「中秋屋邨催淚晚會」，急急腳咁循後門走人，避開一班街坊。就喺林鄭離開嘅時候，東網記者就咁啱經過撞到，影到佢走後門上車離開嘅畫面，但想上前影個近鏡都畀G4攔住，更莫講要問問題。不過，堂堂特區之首，落區唔敢事先張揚，離開仲要走後門，試問顏面何存呀？