政Whats噏：林琳入院割息肉　着病人衫開會

荃灣區議員林琳早前因為輸卵管有水囊，曾經入院做手術，原來佢早幾日再次入院，今次係割腸道息肉，但係佢入院後竟然戴住條手帶順便開埋會，翌日出院後，轉個頭又可以即刻落區做嘢，真係頻撲。

林琳話，佢係周三(11日)早上八點入院嘅，因為做腸道手術，需要清空腸胃，一入院飲完清腸胃嘅藥，十點仲順便開埋嗰間醫院有關低收費病床嘅會議添。由於佢入院做手術，所以着得好求其，着住短褲拖鞋，仲戴住條病人手帶，一開始都冇人知佢有份去開會。

佢話，當日下午約四點半開始做手術，好快就完成，晚上十點就食得嘢嘞，佢之後仲喺病床上做啲文書工作，做到凌晨四、五點，第二日早上出院後，適逢中秋前夕，仲即刻落區派嘢，之後仲出中環開會。雖然做腸鏡同割息肉係小手術，但佢近期都成日有小病痛，都打算睇吓中醫調理吓身體咁話。