政Whats噏：回應師弟師妹公開信　梁美芬籲尊重佢嘅言論自由

一班聖保羅男女中學嘅舊生、學生同教職員早前寫咗封公開信畀立法會議員梁美芬，指身為校友嘅佢建議成立「監察罷課關注組」，又話罷課學生係「集體進行違法行為」，係打壓學生喺自由社會發表意見嘅權利。事隔十日，梁美芬回應公開信，竟然話返班校友打壓佢嘅言論自由轉頭。

梁美芬尋日(17日)喺社交平台貼文回應，話喺佢印象入面，從來都無人好似今次咁，恃住自己認為啱嘅政見去打壓其他校友嘅言論自由，試圖令同自己唔同政見嘅校友噤聲，佢希望同學可以實踐言論自由嘅真諦，尊重他人嘅言論自由喎。

佢要求教育局同學校要保護未成年同學，唔可以縱容罷課，畀政治破壞校園學習寧靜。佢又話有啲學生對自己國家存在嚴重偏見同敵意，令人痛心，又叫仲讀緊書嘅師弟妹去國內城市行下，唔好帶着偏見去睇問題，要感受同觀察國家嘅最新發展，相信佢哋會更愛自己嘅國家喎。