政Whats噏：葉文斌整蠱蘇炤成　一齊扮跳波

雖然話運動係無分年齡嘅，但年近八旬嘅屯門區議員蘇炤成竟然仲同後生仔鬥波，真係估佢唔到。

話說一班屯門區議員尋日去參觀屯門兆麒政府綜合大樓，蘇炤成就同另一位區議員葉文斌喺籃球場中圈有所動作，好似好牙煙喎。不過佢哋只係作狀扮跳波，但蘇炤成仍然跳得相當高，睇嚟身手好唔錯。

葉文斌笑住話，同蘇炤成分別喺交通及運輸委員會做正副主席而有所合作，知道對方好玩得，所以去到籃球場時諗住整蠱對方，邀請一齊扮跳波，認真貪玩。

另外，大樓內仲有乒乓波枱，葉文斌話大家見到之後立即返老還童，仲不分黨派輪住打波，氣氛好融洽喎，難怪佢笑指可以用體育救港喇！如果社會嘅對立氣氛都可以咁易搞番掂，就真係一天都光晒喇！