政Whats噏：學手語唔簡單　區建國搵太太練習

手語喺香港一直未普及，健聽人士同聽障人士好難溝通，香港聾人福利促進會執行委員會主席區建國尋日(22日)出席活動時話手語唔簡單，自己學咗十年都未完全掌握，有時仲會搵老婆做練習對象添！

區話手語喺唔同地方都有好大分別，香港同廣州嘅手語已經唔同，自己學咗十年，香港版本嘅手語都仲未搞掂。佢仲自爆話平日喺屋企得閒都會用手語表達「今日唔返嚟食飯」嚟考下老婆，順便當練習，笑住話老婆依家都已經被訓練到識得部分手語嘅意思啦！

本身係聽力學家嘅區建國話香港好少人識得用手語表達，通常都係嚟睇症嘅病人先會用手語同佢溝通。佢話手語溝通一定要有耐性，自己有時都會遇到好心急嘅病人嚟睇症，手語表達得太快反而容易互相誤解，遇到咁嘅情況就唯有畀啲耐性，做多幾次手勢去解釋啦！