政Whats噏：出席論壇遭圍插　梁美芬被上下夾攻

近排通識教育被指教壞細路，扭曲年輕人身份認同感。立法會議員梁美芬今日(29日)出席一個論壇講及身份認同問題時遭到「上下夾攻」，被台上嘉賓發言「圍攻」之餘，同時被台下人士破口大罵，仲有學生哥追問佢送仔女去外國讀書點樣增加中國身份認同感，成場討論都「聲疊聲」，討論變罵戰。

可能因為身份認同呢個議題惹火，所以論壇一開波就充滿火藥味。話說有泛民立法會議員話年輕人對中國嘅自豪感同認同感本身就低：「就算冇國民教育，係唔係通識教育變中國歷史，就真係可以洗腦？」

梁美芬就回應話係中小學教材出問題，先至令年輕人身份認同感同對國家自豪感下降，所謂嘅通識科係冇教材、任人講。佢認為香港人要先承認中國籍，先會有特區護照，同時需要誠心誠意尊重祖國行事同管理，唔應該用違法行為表達訴求，結果未講完就引來台下觀眾大鬧「賣港賊」！

接住發言嘅香港大學學生會前會長孫曉嵐就話需要公義，對住梁美芬講「好多議員代表唔到香港人，我哋需要雙普選」，梁美芬就話根據《基本法》，係可以循序漸進爭取，但並唔係好似年輕人咁諗，即時全部實現。孫即插咀追問「咁你支唔支持普選？」最後你一言我一語，「聲疊聲」嘈咗上嚟，變咗激烈討論，台下市民亦都鬧埋一份。

冇耐，泛民議員又話「建制派左搖右擺」，講講下梁美芬啱啱想回應，再被泛民議員頂返轉頭話「畀我講埋先，你講咗兩三round啦，我都冇插嘴」。

到現場觀眾提問環節，連中學生都寸梁美芬，「請問你啲囝囡送去外國讀書點樣增加對中國嘅認同感呀？」梁就淨係答「我哋唔應該否定自己係中國人，唔應該攬炒」，點知泛民議員又一句頂埋去話「係你哋建制派帶香港人攬炒！」