政Whats噏:鄉議局搞就職 一度想唔請村代表

2019年10月09日 18:08
東網電視
更多新聞短片
鄉議局大樓日前遭到破壞。
近期香港多處出現示威,某啲地方容易成為目標被破壞,好似位於沙田嘅鄉議局大樓就喺上星期成為目標,據悉破壞唔算太嚴重,但令到鄉議局要重新考慮後日(11日)舉行嘅就職典禮安排喇。
鄉議局每年都會舉行十一酒會,今年就與就職典禮一併用晚會形式喺後日舉行。雖然大樓上周遭到破壞,但聽聞受影響範圍有限,好似地下玻璃門被打爛,牆身有少許塗鴉,預料唔會影響到晚會。
不過,因應大樓情況同埋社會氣氛,據聞鄉議局就晚會安排多作討論,好似有考慮過改作閉門、限制網媒採訪等,亦有諗住縮減規模喺邀請人選上作刪減。以往鄉議局活動邀請多名問責官員到場,聽聞今次有官員唔敢到,就連唔邀請村代表都係選項之一,但最終就覺得呢個做法唔妥當而未有採納,但現時社會情況日日轉變,最終安排仍未有定案。
講真,村代表為各鄉事委員會主席嘅選民,唔畀佢哋參與四年一度嘅就職典禮真係唔多講得通,但同時都理解作為主辦單位要小心行事,減低風險,希望到時情況容許到多啲人參加喇。