政Whats噏:立會前廳還原 李國麟話似無變過

20191009
東網電視
更多新聞短片
復修後嘅前廳同以前一模一樣。(李國麟提供)
立法會大樓今年7月1日被示威者衝擊被打到爛蓉蓉,經過3個幾月嘅搶工復修後,預計下周三(16日)復會,尋日(8日)開放畀傳媒拍攝最新情況,其中前廳只係畀議員使用嘅緣故,傳媒無辦法入內拍攝,內部環境係點就唔知道,衞生服務界議員李國麟今日(9日)朝早就喺社交網站上載咗前廳嘅相,前廳已經還原,同以前一模一樣。
睇當日前廳被破壞嘅相,當時前廳嘅牆身被人寫上「官逼民反」等字句,內裏嘅設施被打爛同滿地垃圾,對比李國麟影嘅相,復修後嘅前廳,牆上嘅字句唔見咗,傢俬嘅擺放非常齊整,銅鑼完整無缺,好似冇被破壞過咁。
李國麟話大樓自七一衝擊過後,好多地方都封晒,無機會睇到損毀情況係點,今日入去前廳,發覺復修咗之後同以前一模一樣,無多無少,依舊有花、枱、櫈同茶水設施喺度,同埋有啲掛畫係牆上,佢話前廳呢個地方對記者嚟講好神秘,議員因為成日用,就好熟悉。
被問到重返前廳有乜嘢感覺?佢形容好似放完暑假咁,返去開會,睇報紙同飲下咖啡,同以往一樣,無乜點變過。